Sobrequilla

A sobrequilla reforza a estrutura que forman as cuadernas e a quilla. Nas imaxes vemos como xa se atopa no seu lugar, e tamén detalles do que será a sentina

A enramada

As cuadernas que xa estaban perfectamente montadas están xa encavilladas cada unha no seu sitio. O traballo da enramada foi relativamente rápido e xa nos permite ver unha estrutura onde albiscar unha dorna de tope.

De proa a popa

Está lista a estructura loxitudinal da Dorna Sara, o que sería a columna onde se vertebran as cuadernas. En breve, a estampa ocupará o seu lugar na popa e comezará o traballo da enramada

A popa avanza

O codaste sigue tirando para arriba. Hoxe están presentadas as diversas pezas que lle dan forma ao conxunto da popa: cuaño, codaste, estampa...

Ponte da hélice

Logo de un pequeno paréntese retómase a construción da Sara. O codaste vai collendo forma coa preparación e ensamblaxe da ponte da hélice, xa perforada para pasar por ela o eixo do motor.

Macizos

Nestes días a actividade de varadas dos Asteleiros Garrido é intensa, como todos os anos nesta época. Mentras tanto sobre a quilla da dorna Sara, os carpinteiros están laminando, ou encolando os macizos, é decir as pezas que reforzan a quilla na roda e na popa. Avanzando.

Bancada

A peza de quilla está xa no seu lugar definitivo. Unha bancada de eucalipto mantén a peza primeira do barco para comezar xa a construción en si da embarcación. Sobre a quilla practicouse o alferíz que é un rebaixe ou canal onde se encastarán os listóns que forman o forro.