Dorna Sara

Dúas embarcacións do Grove no podio do Master Corte Inglés 2011

2011-09-19T23:55:00.006+02:00

Con parte da tripulación do Nocturne e o presidente de Agabace, desposi da entrega de premios

A pasada semana, nos pantaláns de Baiona xestouse de xeito improvisado unha regata de clásicos no marco do Master 2011 do Corte Inglés. o Club Náutico de Sanxenxo convidou aos clásicos presentes a participar do evento.
Aínda que a cira para as categorías de ORC, Platú e Optimist compoñíase de tres probas a disputar venres, sábado e domingo; no caso dos clásicos o calendario limitábase a dúas probas, unha o sábado e outra o domingo. Na primeira xornada o Nocturne deixou ben claro que non ía facer concesións, pero con todo o Miña Miniña demostrou que non da tregua, non en balde remataron as dúas probas en idénticas posicións, con unha marxe máis axustada na regata do domingo. Foi nesta segunda xornada na que a estratexia que adoptaron os patróns dos clásicos se fixo valer, a Sara remontou posicións tras unha saída pouco afortunada e entrou en liña de meta en terceiro lugar, o que lle valeu para situarse no chanzo do bronce na clasificación xeral.

O Cassandra dou guerra na regata do domingo

A Sara acoderada ao Marie, do presidente de Agabace, Guillermo Geffael

A intrépida tripulación facendo banda

O Nocturne of Newport, de Enrique Barreiro, foi o vencedor na categoría

O Miña Miniña, que fixo segundo na clasificación Xeral.

Máis información sobre a regata en
RCN de Sanxenxo
Blog Desmarque
RFEF
El Correo Gallego

Navegando en Baiona

2011-09-12T14:40:00.003+02:00

O pasado venres 9 de setembro daban incio as regatas do XXVI Premio Príncipe de Asturias, organizado polo MRCY de Baiona, no que unha das categorías foi a de Clásicos, na cal entrou a Dorna Sara, ademáis de outros fermosos barcos, entre os que estaban varios socios da recén fundada Agabace (Asociación Galega de Barcos Clásicos e de Época).

Estiveron tamén en Baiona o Aguete e o Giralda, dúas das embarcacións de interese patrimonial, e que moi pronto engrosarán o listado de membros da Agabace.

En canto á clasificación do grupo dos Clásicos, desde o primeiro día o Pingüino deixou ben claro que non ia facer concesións, e así foi, rematando primeiro nas 3 probas disputadas, nas que ofreceu fermosas estampas.

Seguiron nas probas e na clasificación os barcos da fotografía, en segundo lugar rematou o Calúa (amarrado ao pantalán) e nun moi meritorio posto acabab o Miña Miniña, de Fabián Garrido, que puxo toda a carne no asador nas augas costeiras de Baiona.

Nos próximos días a fotografa viguesa María Muiña colgará na súa páxina web a galería de imaxes deste Trofeo, permaneceremos atentos.

Clásicos en San Vicente

2011-08-24T18:46:00.003+02:00

A Concentración de Barcos Clásicos de San Vicente do Mar chegou á súa cuarta edición, un ano máis este Trofeo El Corte Inglés reuniu en augas do Grove e un nutrido e variado grupo de embarcacións de especial interese. E por suposto a Sara non podía faltar.

A pesares de que algún se caiu da lista de inscritos, foron casi 30 as embarcacións que participaron na concentración, bastantes barcos pero pouco vento, a decir verdade, foi por isto que houbo tramos nos que o comité ordeou encender máquinas para completar algún tramo do peculiar rally marítimo que consistiu a mañán de navegación.

Como se pode ver nesta fotografía, a modo de exemplo, houbo moitas tipoloxías de embarcacións no mar: dornas polbeiras, dorna meca, racú, veleiros clásicos, galeóns, snipe, balandros... e ata un 6 metros fómula internacional, o Acacia, un barco de regatas clásico e puro que deixou boa mostra do seu espírito ao completar primeiro o percorrido.

Podedes ler máis e contemplar máis fotografías nestes enlaces:
Todogrove.com
La Voz de Galicia.
La Voz de Galicia (luns)
El Correo Gallego
Amigos da Dorna Meca

X Encontro de Embarcacións Tradicionais de Galicia

2011-07-20T14:37:00.005+02:00

Na primeira fin de semana do mes de xullo, a Dorna Sara chegou a Carril para participar do Encontro de Embarcacións Tradicionais de Galicia, o décimo da historia pero o primeiro para a Sara, i é de esperar que sexa o primeiro de moitos máis que veñan. Unha cita á que non oden faltar todas as persoas que sintan un mínimo de apego ou sensibilidade hacia o patrimonio marítimo e a cultura mariñeira

Numeroso público e tripulantes déronlle vida a este X Encontro, tanto en terra como nos pantaláns, así como nos diversos emprazamentos nos que tiñan lugar as actividades recollidas no programa.

Outro punto moi salientable no Encontro foi o das visitas guiadas á illa de Cortegada, un espazo para a natureza e a historia, que ao percorrer ofrece diversas caras e frondosas extensións con marabillosos exemplares de eucaliptos, loureiros ou carballos.

Na tarde do sábado, un tanto gris de aspecto pero con ventiño do sur e sen choiva, a Sara tamén formou parte da navegación libre nas augas de Carril, unha espectacular imaxe de velas, tipoloxías, orixes e xentes.

Bucetas, dornas de calime, galeóns, botes do golfo ártabro, e máis tipoloxías chegadas de toda as ribeiras da península ibérica

Foto: Club do Mar de Ferrol

E tamén moitas dornas de tope, das que herdou as formas do casco a Sara, nesta fotografía do Club do Mar de Ferrol, podemos ver xuntas a Sara e a Laxe de Boibas, a dorna de tope restaurada polos Amigos da Dorna Meca que se presentaba en sociedade en Carril.

A Tripulación
Nesta fin de semana de Encontro, tuvemos ocasión de compartir navegación, mesa e conversa con moitos amigos, mención especial merecen os compañeiros do mediterráneo, amantes do mar e das embarcacións tradicionais, que conformaban a tripulación da Sara: Jaume, Aina, Joan... e as súas familias agasalláronos coa sua compañía no mar i en terra. A todos eles unha forte aperta e ata a próxima, na Sara seguirán tendo plaza.

A tripulación ao completo

A Dorna Sara en Vilaxoán

2011-06-26T22:43:00.006+02:00

Na mañán deste domingo 26 de xuño, a Sara puxo proa a Vilaxoán, onde se celebraban as xornadas previas ao X Encontro de Embarcacións Tradicionais de Galicia, que se celebrarán a próxima fin de semana no porto de Carril. Este foi un quecemento magnífico, unha oportunidade de compartir mesa e navegación con amigos e barcos.

Despois de xantar houbo navegación na zona.

A semana que ven: máis e mellor!!

A Meca no pantalán das embarcacións máis grandes

Barcos da illa de Arousa e de Bueu

As dornas polveiras todas a un correr

Grandes e pequenos

O Ría de Ferrol e o Eliseo

Traiña, racú e dorna xeiteira, de Bouzas

O Galeón da Abilleira

O Industrial (Prohibido subir abordo)

Moitas bateas hai...

Participación no Salón Náutico de Barcelona

2010-11-18T13:53:00.011+01:00

A Asociación Galega de Carpinteiros de Ribeira, Agalcari, acudiu cun espazo de seu ó Salón Náutico de Barcelona no que ofreceu información detallada dos seus integrantes.

Cargando para marchar a Barcelona

A finalidade era a de dar a coñecelos servizos que prestan e poden ofrecer estes estaleiros caracterizados por un bo facer acreditado no tempo, pero que tamén teñen futuro propio nos mercados actuais, tanto para sectores profesionais como a pesca e a acuicultura coma para o mercado da náutica de recreo.

Para amosar esta idea levada a práctica desprazáronse o estaleiros grovense “Hijos de J. Garrido”, con Pepe e Fabián Garrido á fronte e coa Dorna Sara que, sen dúbida, foi a estrela do Salón Náutico non so polo número de visitantes e profesionais recibidos a bordo –incesante durante os oito días- ou polo concepto de embarcación tradicional adaptada ó ocio, senón pola idea que defenderen os irmáns Garrido de seren capaces de utilizala súa sabedoría ancestral para facer barcos á medida dos soños de cada un, barcos únicos, como é o caso da Dorna Sara, aparte, por suposto, da súa coñecida capacidade para traballos en calquera rehabilitación ou posta ó día de embarcacións que, total ou parcialmente, empreguen a madeira.

O persoal do Asteleiro

A propia organización do Salón Náutico no primeiro dos vídeos promocionais,xusto despois das imaxes da inauguración oficial polo Alcalde de Barcelona e a Alcaldesa de Hospitalet, contén unha visita bastante detallada á Dorna Sara e ó resto do Spai de Marina Tradicional no que había stands do País Vasco, Cataluña, Baleares, Canarias e ata de Irlanda e onde se celebraron actividades diversas (construción en vivo dun curach, taller de nos, charlas, actuacións musicais i etnográficas...).

Pepe Garrido explicando a construción do Parrulo aos alumnos da Escola de Inxeñería de Barcelona

Hai que destacar tamén o espazo da Federación Galega pola Cultura Marítima e Fluvial con persoal durante os oito días distribuíndo información sobre os Encontros de Carril 2011, así como a presentación deles, que contou coa presenza da Alcaldesa de Vilagarcía.

O stand da FGCMF

Tanto o público afeccionado como o profesional amosaron a sorpresa diante do concepto da Dorna Sara e gabaren tanto os materiais e o proceso construtivo como o seu completo equipamento como embarcación para o ocio, resaltando a integración acadada por Hijos de J. Garrido da última tecnoloxía nun barco de formas clásicas construído no século XXI.

De volta ao Grove

A Sara na III Regata de Clásicos de San Vicente

2010-09-02T15:01:00.010+02:00

Os asistentes vendo os barcos antes da saída

A III Concentración de Clásicos, celebrada na Enseada da Lanzada, e organizada polo Club Náutico San Vicente coa colaboración da Asociación de Amigos da Dorna Meca, resultou este ano un éxito que esperemos que se confirme na vindeira edición na que non deberían fallar barcos coma o Industrial ou o Cortegada que, daquela, xa estarán, seguramente, completamente armados.

A Sara entre o Evangelina e A Nova Jorita

Na regata os da Sara O erramos na estratexia: quixemos saír á busca de vento cara ó Oeste e perdemos un tempo extraordinario, mentres as outras embarcacións ían de empopada cara ó Camouco. Cando chegamos ó faro so quedaban detrás de nós o Evanxelina de Rianxo, o Garabullo de Viveiro e o Nordik. Dende a Faxilda intentamos alcanzar ó Naia, despois elixido o máis fermoso polos participantes, pero non fomos quen.

O Naia coa Airexa de fondo

Á nosa falla de pericia xuntouse que os ventos eran absolutamente febles, 2, 3, 4, 5 e, como moito, 6 nós, de xeito permanente, e penso que a Sara O precisa de mais vento para render ben. Pero o que interesa foi que se ofreceu un espectáculo moi interesante nas augas da Lanzada, onde as praias do Xeixeliño, Area da Crus, Paxareiros e Lanzada foron unhas tribunas privilexiadas para observar a regata.

Un galeón, un snipe e un Camper&Nicholson, exemplo de variedade da regata

A organización ten pensado, para o vindeiro ano, organizar un concurso de fotografía para a xente que estea nesas praias, que remitirá as fotos por vía electrónica e darase o premio coincidindo coa entrega de trofeos da regata.

En resumo: imos aprendendo a facer navegar á Sara.

Foto de familia cos premiados

Navegando entre galeóns

2010-07-27T21:41:00.004+02:00

O vento nordés con refachos de ata 25 nós da mañá do 24 de xullo, non parecía propicio para a Concentración, pero alá saímos cara a Vilanova polo Oeste da Illa de Arousa. Hora e media e entramos no porto pesqueiro de Vilanova que hai que aprender a coñecer, polos lombos de area. Un espectáculo importante: O Industrial era o centro de atención, coas autoridades a bordo. Pero estaban case que todos os demais: Nova Jorita, Evangelina, Luisa, O Silma, Nuevo Sofía...un espectáculo interesantísimo; nunha crónica periodística escribiron que os turistas esgotaban a capacidade das súas cámaras e foi verdade. Con bastante puntualidade a flota deixou o abrigo de Vilanova e puxeron rumbo a Catoira, de novo a motor polo vento de proa, non sendo o Silma e o Novo Sofía que fixeron un bordo cara a Rianxo e ergueron velas dúas ou tres millas ata Cortegada. Dende alí, co barco viquingo guiándonos polos lombos do Ulla, chegamos a Catoira, onde había preparada unha especie de romaría e onde coincidimos cos ensaios do asalto viquingo e ata con walkirias a cabalo. A volta converteuse nunha festa da vela con tódolos barcos con ventos pola aleta, pola popa... un espectáculo fantástico. O día rematou en Vilanova nunha cea na que entregaren un agasallo a cada barco participante.

Navegación nunha tarde de norte

2010-07-22T21:51:00.003+02:00

A Dorna Sara sigue a navegar, cando está preto o aniversario da botadura o pasado sabado houbo saída pola ría, co foque pequeno, que xa era suficiente para o abundante vento, a bordo ía Eusebio Lázara, un director teatral orixinario de Cartagena, e un redactor de La Voz de Galicia, que publicou unha reportaxe con un titular que non foi do mais acertado.

Pica na imaxe para ver a reportaxe

Seguimos a navegar

2010-05-30T16:40:00.009+02:00

A pesar de que esta web leve algún tempo inactiva a actividade da dorna Sara é continua, desde hai varios meses as navegacións semanais son practicamente continuas, saídas para disfrutar da navegación a vela, con ventos frescos que puxeron a proba o gran potencial da embarcación.

Nesta entrada podedes ver unhas fotografías de algunha das travesías da dorna Sara, que agora amarra en San Vicente.

De volta, saído do porto de Ribeira
A dorna Sara amarrada ao peirao da Illa de Ons

Chegando á Pobra do Caramiñal, onde estaba o Bermeotarrak IV

Hoxe mesmo en Cíes

II Xornadas de construción naval en madeira "Un Mar de Madeira"

2009-10-26T13:21:00.004+01:00

Esta fin de semana vanse celebrar en Ribeira as II Xornadas de construción naval en madeira "Un Mar de Madeira", organizadas pola Asociación Galega de Carpintería de Ribeira (Agalcari).

A cita para esta segunda edición, que o pasado ano se celebrou en San Vicente do Mar, será o sábado 31 de outubro na Casa do Pescador, na avenida do Malecón s/n.

Neste enlace podedes consultar o programa en formato PDF, que se ilustra con unha fotografía da Dorna Sara.

Desde Galicia para el mundo

2009-09-29T00:39:00.004+02:00

Na última emisión do programa televisivo "Desde Galicia para el mundo" adican parte do seu tempo a unha reportaxe sobre o traballo dos irmáns Garrido no seu asteleiro. Tamén falan sobre a recente construción da Dorna Sara.

Podedes ver o video pinchando aqui.

A Dorna Sara na II Regata de Clásicos Emprosal

2009-09-07T00:03:00.006+02:00

A dorna Sara xa goza dunha vida plena, completa a súa construción i equipación comezou a navegar.

Unha das súas primeiras travesías foi para tomar parte na II Regata de Clásicos Emprosal, organizada polo Club Náutico San Vicente do Mar, e que se celebrou o pasado 23 de agosto. A navegación trancorreu sen incidencias e houbo oportunidade de probar os diferentes rumbos e velas que pode combinar a embarcación.

Mais fotografías e a clasificación completa na noticia de Todogrove.com

Fotografías da regata na web do CNSV

Máis prensa

2009-08-20T08:27:00.000+02:00

Hoxe é La Voz de Galicia a que se fai eco da botadura

Nos medios

2009-08-19T17:04:00.008+02:00

Foron varios os medios de comunicación que se interesaron pola Dorna Sara, tanto no referente ao proceso constructivo como ao momento da botadura, hoxe en Faro de Vigo edición Arousa dedícanlle a portada e páxinas interiores ao feliz acotecemento.

Botadura!!!

2009-08-18T20:38:00.014+02:00

Deixámos aqui unhas poucas fotos da botadura da Dorna Sara, esta tarde no peirado do Grove foron moitos os amigos que non se quixeron perder este momento tan especial. A pequena Sara fixo de madriña do barco que leva o seu nome. Logo houbo saida de navegación polas augas da ría. Estamos de festa!!!

A nova nos medios de comunicación:
Todogrove.com
TVG
Faro de Vigo

Hoxe é o día

2009-08-18T09:19:00.003+02:00

Hoxe martes, ás 15.00 horas, terá lugar a botadura definitiva da Dorna Sara. Esta tarde a embarcación abandonará as instalacións dos Asteleiros Hijos de J. Garrido, para pasar a formar parte da flota do Grove.
Vémonos no porto.

A conta atrás: 3 dias

2009-08-16T19:55:00.003+02:00

A falta de tres días para a botadura definitiva da Dorna Sara son moi poucas cousas as que quedan por facer, pequenos remates na súa maior parte. Pomos como exemplo o forrado da forquilla, elaborado en coiro e fixado con toda precisión para protexer a erosión e o desgaste desta peza contra o palo. Durante esta semana tamén se elaboraou a xarcia movil e toda a parte electrica no interior da embarcación.

Patente e máis verniz

2009-08-05T19:21:00.005+02:00

Xa se lle deu o patente na obra viva da Dorna Sara. No interior da embarcación atópase estes día o electricista preparando toda a instalación así como as conxións de toda a electrónica.Fora do barco xa podemos ver como lle senta o verniz á percha e a botavara da maior, que lucen deste xeito.

Percha

2009-07-31T20:15:00.003+02:00

Xa amosamos nunha entrada anterior como se elaborou a forquilla da percha con madeira laminada. Pois ben, a forquilla fíxase á percha da vela, na percha instálase un ferraxe que terá doble utilidade: na súa parte superior amárase a driza de boca, e na parte inferior do mesmo elemento fixarase o puño de driza de maior.

Vernices

2009-07-30T17:39:00.004+02:00

Ademáis da continuación dos traballos interiores a Dorna Sara recibe mans de verniz en cabina, tapa regala, estampa de popa e trancanil. Tamén se aumentou o lastre do quillote, engadíndolle chumbo fundido.

A forquilla

2009-07-23T21:20:00.007+02:00

A Dorna Sara xa está de volta no asteleiro logo de pasar as probas de estabilidade. Os carpinteiros puxérona de novo enriba dos tacos e nivelárona, marcándolle a liña de flotación para realizar os remates que quedan. Tamén se están a completar os aparellos precisos para a manobra da vela. Como por exemplo a forquilla da verga, que é de madeira laminada e xa vai tomando forma.

Navegación de probas

2009-07-21T14:37:00.002+02:00

O pasado domingo durante a navegación de proba do motor grabamos un pequeno video no que se aprecia a andadura da Dorna Sara.

Probas de estabilidade

2009-07-20T15:05:00.006+02:00

Hoxe luns no porto de pasaxeiros do Grove embarcaron na Dorna Sara o enxeñeiro naval e o xefe de inspección de buques para realizar as probas de estabilidade da embarcación. Tamén se atopaba abordo Pepe Garrido, o responsable da construción da Sara.

No mar

2009-07-19T16:33:00.007+02:00

No mediodía deste domingo a Dorna Sara foi levada ao pequeño varadoiro do Con das Señoritas, a escasos metros do asteleiros dos Garrido, para levala ao amarre onte mañá se lle farán as probas de estabilidade. Unha vez feitas estas probas continuará o traballo e os remates para a botadura definitiva.
Como se pode ver nas fotografías a embarcación ofrece unha imaxe hermosísima e conta un unha bonita andadura na navegación.

No carro

2009-07-18T22:52:00.006+02:00

Despois de un intenso traballo nos últimos días, a Dorna Sara está xa arbolada e no carro, mañá domingo tocará a auga para que o luns se lle realicen as probas de estabilidade. Durante a xornada porase en marcha o motor e algún dos outros dispositivos cos que conta.

Ferraxes varios

2009-07-17T15:07:00.004+02:00

O traballo na dorna Sara céntrase no interior da embarcación, nas instalacións de auga, electricidade, electrónica e demais... Tamén no exterior se rexistra actividade, coa instalción de cadenotes, candeleiros e outros ferraxes como os do timón ou o botalón.

Timón

2009-07-07T14:37:00.003+02:00

Ademais de unhas man de saturador para a madeira, comprobamos que na estampa de popa xa están instalados os dispositivos precisos para o manexo do timón.

Faro de Vigo adícalle unha páxina a este blog

2009-06-26T14:08:00.003+02:00

Na páxina 16 do Faro de Vigo de hoxe, na súa edición de Arousa, así como na súa edición dixital, adícanlle unha páxina completa á construcción da Dorna Sara, que vimos seguindo puntualmente nas entradas deste blog.

Nesta noticia coméntase o proceso de construción e caompáñase de un abondoso número de fotografías, na edición en papel.

O noso agradecemento polo tratamento e a difusión.

Motor, eixo e hélice

2009-06-26T13:56:00.005+02:00

Esta mañá de venres foi intalado abordo o motor principal da dorna Sara. Trátase dun motor de centro diesel da casa catalana Solé.

Unha vez ubicado no seu lugar procédese a comunicar o eixo coa saída do motor, e procurando a mellor posición, que será a definitiva.

Finalmente fixarase a bocina, un cortacabos e a hélice.

Quillote

2009-06-17T19:13:00.005+02:00

A Dorna Sara foi movida do seu sitio orixinal por primeira vez. Este desprazamento ata o foso, tivo como obxecto a colocación do quillote, que xa amosamos nunha entrada anterior, recheo de chumbo e que se fixou á quilla mediante cavillas. Ao mesmo tempo estase a continuar co empastado, lixado e imprimación.

Varias tareas

2009-06-11T20:46:00.005+02:00

O casco foi empastado logo da primeira man de imprimación, logo foi lixado.

Mentras tanto o ferreiro entregou xa o quillote, que se recheou con chumbo e que será fixado na quilla da Dorna Sara.

No interior, despois de recibir os tratamentos de nutrición e proteción da madeira, estase realizando a instalación de fontanería para as diversas canalizacións. Tamén se puxeron bomba de achique e o refrixerador.

Iimprimación

2009-06-08T22:37:00.004+02:00

A Dorna Sara xa recibiu a súa primeira man de imprimación, salvo nas zonas onde irá con verníz, como o bauprés e a estampa de popa, hoxe os carpinteiros empastaban xuntas e reparabas o exterior do casco.

A marca da casa

2009-06-07T00:47:00.005+02:00

Os carpinteiros de riberia teñen tamén as súa marca. Cada asteleiro ou carpinteiro remata de un xeito diferende a cinta dos barcos na proa, e na popa cando é posible, o que convirte o remate da obra morta nunha caracteristica identitaria propia.

En definitiva: a firma de cada constructor naval.

No caso do asteleiro dos Garrido, a súa marca é esta sorte de G maiúscula, que xa podemos ver na proa da Dorna Sara.

Varios detalles

2009-06-06T02:55:00.007+02:00

Son varios os puntos que merecen a nosa atención no proceso constructivo da Dorna Sara.

Por unha banda os interiores e a bitácora reciben aceites, saturadores e outros tratamentos de nutrición e proteción da madeira.

Por outra banda as pezas interiores foron coidadosamente lacados, polo que se lles retira a cinta e se repasan os acabados, para que o resultado sexa o mellor posible.

A cinta

2009-05-31T17:04:00.007+02:00

Mentras a madeira dos interiores recibe tratamentos de protección e acabados, no exterior do casco os carpinteiros están a presentar a cinta, que se ubica na parte inferior do trancanil de ambos costados, e de proa a popa.

Por que madeira? V

2009-05-27T23:32:00.004+02:00

As calidades estéticas e a experiencia visual de permanecer a bordo rodeados por materiais naturais son, por suposto, , subxectivas: pero reto a calquera para ver se prefire o plástico branco ou a madeira natural

Por que madeira IV

2009-05-21T18:44:00.010+02:00

Pero non precisa a madeira de moito mantemento? É verdade que para barcos construídos dun xeito tradicional o mantemento da madeira é unha tarefa máis ou menos constante, como se ve pola experiencia diaria nos nosos portos. Pero non é así para embarcacións feitas coa tecnoloxía e cos materiais actuais. Tódalas superficies de madeira exposta ás influencias externas de sol e mar están protexidos por resinas. A madeira seca conservada deste xeito mantén tódalas súas extraordinarias características practicamente sen envellecemento, durante décadas, e os custos de mantemento ordinario dun casco non son superiores aos de fibra ou metal.Asistimos á colocación do último dos bances, o casco está xa completamente forrado, o costado de estribor está a ser lixado, a Dorna Sara xa mostra un aspecto ben avanzado. Falta menos para a botadura...

banceando e demais

2009-05-18T00:25:00.007+02:00

Continúa o banceado, que está a ser a actividade prioncipal á que se están dedicando os carpinteiros, aínda que por outra banda xa se están adiantando traballos como o lixado do casco o pintado da parte superior da cbina ou a instalación e elaboración do temón.

Por que madeira (III)

2009-05-13T17:26:00.004+02:00

A madeira ten características acústicas e térmicas mellor cas doutros materiais, por iso non hai problemas coa condensación sobre o forro de paredes interiores. As características galvánicas tamén son ideais.No Asteleiro Hijos de J. Garrido continua o forrado do casco, que xa se ve bastante avanzado.

Por que madeira? II

2009-05-05T23:39:00.004+02:00

A madeira é o material máis resistente ao chamado estrés dos materiais, coñecéndose con esta denominación a reducción da súa forza como consecuencia da intensa actividade dinámica. Ao navegar, a estructura dun barco está baixo o impacto dinámico constante da auga e do peso de seu. As probas realizadas amosan que pezas de diversos materiais postos baixo a mesma presión dinámica un millón de veces durante 30 horas van a perder forza como segue:
-Fibra de vidro mantén aínda non o 22% da forza orixinal.
-O Aluminio mantén o 37% da forza orixinal;
-A Madeira laminada con resina epóxi mantén o 64% da forza orixinal.

Amosamos o tunel de fibra onde traballará a hélice de proa.

Por que de madeira?

2009-04-27T15:51:00.004+02:00

Mentras continúa o banceado da Dorna Sara exporemos en varias entregas os motivos de porque decidirse pola madeira á hora de afrontar unha construcción naval.

En relación con outros materiais navais estándar, como a resina de poliéster, o aluminio e incluso o aceiro de alta calidade, a madeira ten o coeficiente de calidade máis alto. O coeficiente de calidade dun material de construción é a relación entre a súa resistencia e a súa densidade. Isto significa que un barco de madeira pesará menos que un das mesmas medidas e construído de igual xeito para ter a mesma resistencia. Ou, noutras palabras, entre dúas embarcacións de igual peso e igual tamaño, a de madeira terá unha resistencia moito maior. Canto máis alto sexa o coeficiente de calidade, máis aconsellable será o material para os obxectivos a construír, especialmente se o que se pretende construír ten que ser lixeiro, pero forte, tanto sexa en barcos como en avións. É indubidable que este é un factor de relevancia capital á hora de elixir os materiais de construción.

Máis topes

2009-04-19T21:42:00.007+02:00

Continúa o traballo do banceado. Hai un carpinteiro traballando por cada costado da Dorna Sara e os bances avanzan cara arriba.

Empezando a bancear

2009-04-13T20:01:00.006+02:00

Comeza a semana dos carpinteiros banceando a Dorna Sara. Despois de por dúas tablas máis anchas que as demáis por cada banda, empezan xa a poñer os topes que vimos ao principio da construción.

Primeira táboa

2009-04-03T21:37:00.005+02:00

A semana remarou con varios traballos simultaneos. Por unha banda preparouse o renate dos cantos da cabina, e por outra preparouse a primeira tabla do forro, a táboa de pardequilla, que como o seu propio nome indica vai pegada á quilla e facilitará a faena de bancear, correxindo unha curva excesiva das seguintes táboas, que son alistonadas.

Varios axustes

2009-03-31T00:04:00.005+02:00

Os carpinteiros prosiguen o seu traballo na dorna Sara, atópanse nestas xornadas axustando a tapa regala así como algún dos remates da cabina. No interior os mamparos recibiron xa un fondo, de ahí a cor branca que se aprecia nas fotografías.

Interiores

2009-03-27T15:31:00.002+01:00

Estes días a Sara está recibindo atencións no seu interior, logo da festa por ter a cuberta lista o traballo continúa. Na imaxe podemos ver o aspeco da madeira barnizada nos interiores así como os balncos teitos.

O Ramo da cuberta

2009-03-13T21:22:00.009+01:00

Tal e como fomos vendo nesta páxina a cuberta quedou rematada. Hoxe venres houbo o ramo correspondente, xa que a cuberta ao ser nova "estaba moi seca". O asteleiro dos Garrido acolleu esta pequena festa na que se reuniron amigos, familiares e os profesionais que traballan no barco.

Varios detalles

2009-03-06T23:59:00.008+01:00

O encolado das xuntas de teca da cuberta xa está rematado, co sobrante eliminado e lixado. Outros detalles van avanzando por medio das oportunas probas e axustes, esta primeira fotografía é boa mostra delo, xa que podemos ver o botalón da Dorna Sara.

Bitácora

2009-02-16T15:23:00.006+01:00

A bitácora xa está visible. Neste elemento instalaranse os aparatos electrónicos e mecánicos precisos para a navegación, aos que corresponden os ocos practicados no mesmo, as pantallas da sonda, gps-ploter e demáis xa teñen listo o seu sitio.

Cuberta encolada

2009-02-12T02:04:00.005+01:00

Láminas e espiñas están xa encoladas á cuberta, e o resultado é verdadeiramente satifactorio. Agora solo lle falta rechear as xuntas con un forte adhesivo sintético.

Piso da bañeira

2009-02-06T17:46:00.003+01:00

O piso da bañeira da Dorna Sara ten o mesmo acabado que a cuberta, na fotografía podemos apreciar un detalle do mesmo, onde se ubicará a bitácora, así como a espiña central.

E continuamos...

2009-02-06T00:44:00.006+01:00

A construcción sigue adiante, no interior prepárase a fogonadura do palo, e en cuberta todo está pronto para encolar as espiñas, que foron presentadas e imprimadas esta mesma tarde, o que significa que a cuberta está case rematada.

Moi importante: o asento do patrón

Pequenos detalles

2009-01-30T21:42:00.010+01:00

Nos barcos, coma en todo, hai pequenos detalles que revelan o bo gusto e o saber facer. Na Dorna Sara empezan a ser algo máis notorios estas cousas, que atinxen algo máis aos acabados que á propia construcción. Dan boa conta desto as fotografías que amosamos. Como no caso dos chanzos de acceso ao interior da embarcación.

Cuberta presentada

2009-01-23T00:07:00.006+01:00

As láminas de teka están xa presentadas sobre a cuberta, o seguinte paso será o seu encolado definitivo.

A cuberta e interiores

2009-01-14T18:24:00.007+01:00

A cuberta da Dorna Sara será de teca. Ao tempo que un carpinteiro avanza no reparto do interior comezou o traballo en cuberta colocando a primeira das táboas. Ofrecemos tamén unha imaxe de como están quedando o habitáculo.

Reparto da cabina

2009-01-09T10:54:00.006+01:00

Xa podemos ver onde se situarán os elementos da cabina, de novo empréganse os lazos para conformar as distintas partes das mesma.

Baos da Cabina

2009-01-07T12:04:00.004+01:00

Continúan os traballos na Dorna Sara. Por un lado son distribuidos os baos laminados da cabina, e por outro toma forma a distribución da bañeira cos distintos lugares de estiba.

Mamparos de cabina

2008-12-30T16:29:00.005+01:00

O armador comproba in situ a distribución da Dorna Sara.

Xa mostramos nesta web a proba de como quedaban presentados os mamparos da cabina, nestes días fixouse o conxunto no seu lugar.

Cabina

2008-12-24T01:54:00.005+01:00

Unha vez fixados os teitos interiores sobre os baos, onde irá disposta a cuberta, é o momento de adicarse á cabina. Hoxe tomaron posición os laterais e nos proximos días poderemos ver todo o perímetro da mesma, ao tempo que continúan os traballos de aproximación de cintón imbornais e tapa regala.

Divisións interiores e imbornais

2008-12-19T11:21:00.007+01:00

O interior da dorna Sara ten xa espacios definidos, estase levando a cabo a distribución da habitabilidade e a estiba. Ao tempo os carpinteiros ubican o cintón co correspondente imbornal corrido.

Teitos e divisións

2008-12-05T18:24:00.006+01:00

Unha vez planteada a estrutura da cuberta é o intre de realizar as divisións interores do casco. Ao mesmo tempo tamén se elaboran teitos das dependencias habitables. Nas fotografías apreciamos tamén as "cuerdas" instaladas na cara interna das cuadernas.

A bañeira

2008-11-03T17:46:00.005+01:00

Logo de moitos durmintes, baos medios baos fortemente unidos por precisos lazos xa se albisca o reparto da cuberta da Dorna Sara. Corredores, bañeira, cabina, escotillón e cofete van xa tomando forma.

Baos e medios baos

2008-10-30T16:44:00.006+01:00

Esta semana a actividade que rexistra a Dorna Sara refírese á confeción da cuberta, ou máis ben dos elementos que soportarán a cuberta e os corredores. Os baos van de costado a costado, e os medios baos pousados nos durmintes configuran a forma da cabina, os corredores e a bañeira.

Trancanís

2008-10-02T21:17:00.008+02:00

Os trancanís da Dorna Sara xa foron completamente elaborados e no lugar que lles corresponde, con algún dos dumintes da cuberta.

Xuntanza de bloggers da Cultura Marítima

2008-09-24T22:09:00.005+02:00

Será o sábado 4 de Outubro nas instalacións do Club Náutico San Vicente do Mar no Grove. Ímonos a xuntar as e os administradores de blogues de temática marítima ou que mostran sensibilidade ao mar desde as máis diversas ópticas. Trátase dunha Xuntanza Blogueir@ que ten como finalidade fortalecer os vínculos de amistade das persoas que coincidimos no espazo marítimo da blogosfera, haberá un xantar, e logo teremos a oportunidade tomar un café na compaña de Staffan Mörling, e ás 20.00 horas Conversas cos Paradas, unha familia grovense que ten moito que falar de patrimonio marítimo.

Tamén temos como obxectivo sentar as bases, desde a identificación coa Federación Galega da Cultura Marítima e Fluvial, da consolidación e ampliación dun espazo cívico aberto na blogosfera en favor do patrimonio material e inmaterial da cultura marítima. A Xuntanza Blogueir@: o mundo do mar e as embarcacións tradicionais, consistirá nun xantar de confraternización e nunha mesa redonda na que tratar temas de interés común. A tarefa de coordenación tena asumido Mar de Una Mirada a la Ría de Vigo polo que se queres asisitir non tes máis que comunicarllo á organización a través do e-mail: canido38@yahoo.com Anímate!!!!

Trancanil

2008-09-22T13:53:00.004+02:00

Rematado o traballo coas cuadernas é o momento de elaborar as pantillas e preparar os trancaniles de ambos costados. A través dos mesmos pasan os extremos superiores das cuadernas e neles uniranse os baos, as cuadernas e o forro da embarcación.

Calzos e palmexares

2008-09-17T12:40:00.002+02:00

Os calzos onde se fixará o motor diesel intraborda están xa listos, ao tempo que os palmexares toman o seu lugar no interior das cuadernas, uníndoas entre si, reforzando a estrutura e impedindo flexións do casco.

Grande e pequena

2008-09-07T00:00:00.005+02:00

Estes días no taller ao lado da Dorna Sara estivo outra dorna. Unha dorna de calime de 9 cuartas, das de regatear. Podemos ver na fotografía a comparativa do tamaño. Ao tempo que os carpinteiros afinan o trazado das cuadernas das rodas e das amuras.

Cuadernas e estampa

2008-08-29T10:40:00.007+02:00

A dorna Sara amosa unha grande evolución, o conxunto de codaste e estampa está xa rematado, e son as primeiras e as últimas cuadernas as que centran o traballo destes días

Sobrequilla

2008-08-21T14:14:00.003+02:00

A sobrequilla reforza a estrutura que forman as cuadernas e a quilla. Nas imaxes vemos como xa se atopa no seu lugar, e tamén detalles do que será a sentina

A enramada

2008-08-16T23:55:00.009+02:00

As cuadernas que xa estaban perfectamente montadas están xa encavilladas cada unha no seu sitio. O traballo da enramada foi relativamente rápido e xa nos permite ver unha estrutura onde albiscar unha dorna de tope.

De proa a popa

2008-08-08T01:06:00.008+02:00

Está lista a estructura loxitudinal da Dorna Sara, o que sería a columna onde se vertebran as cuadernas. En breve, a estampa ocupará o seu lugar na popa e comezará o traballo da enramada

A popa avanza

2008-08-04T23:17:00.002+02:00

O codaste sigue tirando para arriba. Hoxe están presentadas as diversas pezas que lle dan forma ao conxunto da popa: cuaño, codaste, estampa...

Ponte da hélice

2008-08-04T00:36:00.003+02:00

Logo de un pequeno paréntese retómase a construción da Sara. O codaste vai collendo forma coa preparación e ensamblaxe da ponte da hélice, xa perforada para pasar por ela o eixo do motor.

Macizos

2008-06-19T00:17:00.006+02:00

Nestes días a actividade de varadas dos Asteleiros Garrido é intensa, como todos os anos nesta época. Mentras tanto sobre a quilla da dorna Sara, os carpinteiros están laminando, ou encolando os macizos, é decir as pezas que reforzan a quilla na roda e na popa. Avanzando.

Bancada

2008-06-12T00:31:00.008+02:00

A peza de quilla está xa no seu lugar definitivo. Unha bancada de eucalipto mantén a peza primeira do barco para comezar xa a construción en si da embarcación. Sobre a quilla practicouse o alferíz que é un rebaixe ou canal onde se encastarán os listóns que forman o forro.

Posta de quilla

2008-06-08T03:13:00.015+02:00

A quilla fica pronta para montar nela as varengas, formadas de cinco partes cada unha. Como di a tradición a quilla foi mollada con un bo viño, servindo como un presaxio de longa vida á embarcación. Representantes de diversos colectivos socias vinculado á cultura marítima asistiron ao ramo, así como o armador e un grupo de familiares e amigos.

Fotografías por cortesía de www.todogrove.com

Outro raio de Júpiter

2008-06-06T01:42:00.008+02:00

Todo está disposto para pinchar a quilla, esta tarde o carpinteiro dispoñia todo o necesario para a unión da roda coa quilla, tamén por raio de Júpiter. Nas imaxes podemos ver como quedou o laminado da peza da proa, que contrasta armónicamente coa quilla de unha única peza.

Unindo a quilla e o pinchón

2008-06-05T13:59:00.006+02:00

Para unir a quilla co pinchón, é dicir a parte de popa da mesma, procédese a trazar a unión mediante raio de Júpiter, denominada así pola súa forma, esta efectiva unión axustase finalmente coa inserción de unha cuña que se cortará enrasada unha vez que se atope correctamente ubicada.

Encolando o pinchón

2008-06-05T00:28:00.004+02:00

Como xa dixemos a quilla estará formada por tres partes, a proa, a quilla e o pinchón. Este último xa está encolado, formado por tres pezas e listo para pasar a ser un todo na peza final. A unión realízase mediante resinas epoxídicas.

Cortando a quilla

2008-06-03T22:32:00.011+02:00

Para crear a quilla os carpinteiros de ribeira van ter que empregar varias pezas: a proa e roda laminadas, o pinchón tamén laminado en tres pezas e a quilla en si de unha soa peza de iroko. Esta tarde no taller marcouse a peza de quilla e procedeuse ao seutrazado, corte e posta a escuadro, á espera de ensamblar o conxunto e "pinchar" a quilla no seu lugar definitivo onde tomará forma a dorna Sara.

Alistonada

2008-06-03T22:18:00.004+02:00

Xa está no taller a madeira de caoba alistonada preparada para forrar as cuadernas.
Cada listón ten 18 mm. de ancho e 28mm de alto, e unha lixeira forma “machiembrada” nas partes onde un listón se une co seguinte para darlle maior estanquidade e robusteza ao casco. Neste método de construción os listóns substitúen aos banzos, que irían fasquiados, en troque todos os listóns teñen a mesma forma.

Laminado da proa

2008-06-02T13:53:00.007+02:00

Como alternativa á madeira de unha soa peza, cando se busca determinado tronco para a proa e o pinchón dados o seu tamaño e curvatura, temos a alternativa do laminado, que consiste en encolar pezas máis finas e rectas sobre un molde coa forma desexada. Con esta técnica conséguese a peza coa forma e tamaño desexado e con unha fortaleza reforzada pola súa estrutura, xa que se superpoñen e encolan numerosas láminas finas de madeira ata o tamaño final.

Cuadernas ensambladas

2008-05-29T22:51:00.010+02:00

Como quedou dito o esqueleto xa empeza a coller forma. As pezas que viamos apiñadas no asteleiro fóronse ensamblando e neste intre xa son as “costelas”, as cuadernas como serán desde a quilla ata a regala.

Collendo forma

2008-05-28T00:01:00.010+02:00

As cuadernas van pasando pola serra onde se lles aplica a falsa escuadra, que varía en varios puntos da mesma, tanto no exterior coma no interior. O esquelete da dorna Sara xa vai collendo forma.

A falsa das cuadernas

2008-05-27T00:47:00.009+02:00

Despois de pasar cuadernas e varengas polo regrueso hai que darlles a cada unha delas a falsa escuadra, ou caída correspondente na súa cara exterior, é dicir a forma que terá o exterior do casco, conde irán os forros. O mesmo para as varengas, onde se practica un taladro para a súa fixación a quilla.

Cortar as cuadernas

2008-05-24T04:00:00.008+02:00

Unha vez feitas as plantillas de chapa, lévase a súa forma á tabla, neste caso de iroko. A forma desta cuaderna non é a definitiva, trázase con unha certa marxe, xa que logo de regruesalas hai que darlle en cada punto a súa correspondente caida ou “falsa escuadra”, de acordo do plano de liñas de auga da embarcación.

Trazado das plantillas

2008-05-23T00:19:00.016+02:00

Unha vez levados os planos ás mans do carpinteiro de ribeira, este procede ao trazado das pantillas das futuras cuadernas e varengas. No documento técnico descríbese a forma do "esquelete" da embarcación partindo da cuaderna mestra ata a proa e ata a popa.

Sobre o plano

2008-05-22T22:57:00.000+02:00

Logo de tomar a decisión de embarcarse neste proxecto hai que poñerse a traballar, o primeiro paso: os planos. Achegamos unha imaxe do que será a Sara, só hai que engadir a cabina.

Benvidos a bordo!

2008-05-21T21:35:00.000+02:00

Benvidos ao blog da dorna Sara, unha dorna de tope de 8,40 metros de eslora, construida con cuadernas de iroko e forros de caoba, en madeira alistonada. Unha embarcación que pretende misturar o encanto dos barcos tradicionais e as comodidades da náutica de recreo.

Desde aquí comenzaremos un completo seguimento da construcción da dorna Sara, nos Astilleros Garrido do Grove, desde os planos ata a botadura, intentaremos que a travesía sexa amena e para elo ilustraremos a viaxe con fotos do paso a paso do proceso.

Benvidos a bordo!!